Find Us On

|
Home > News

Quick Job Search

Latest Jobs

面試可能忽略的細節

面試可能忽略的細節

有心見好一份工嘅人都會喺面試前做足準備,熟讀公司背景、職位嘅各項要求,甚至會「Tip題」,然後將每題題目嘅答案都準備好,以免去見工嘅時候腦袋一片空白。見工前做足準備絕對係好事,不過唔好以為行入間房,答到面試官嘅問題就係面試嘅全部。喺整個面試過程入面仲有好多細節要留意,如果忽略咗,無論你之前做咗幾多準備,都可能令你前功盡廢。
 
 

1. 講嘢嘅速

呀花係一個啱啱畢業嘅學生,呢日入到房睇佢表情已經好緊張,雖然我一臉和善咁同佢寒暄咗兩句,但都舒緩唔到佢緊張嘅心情。當佢開似介紹自己嘅時候,好明顯佢準備非常充足,皆因佢一開口就連珠砲發咁將佢準備好嘅自我介紹背曬出嚟。佢嘅講嘢速度,一下子由之前嘅巴士,短時間內加速到Ben士。佢講嘢嘅句子中間幾乎冇停頓位,聚精會神咁聽都聽得好辛苦。其實見工都係溝通嘅一種,我地用一種令人唔舒服嘅語速去溝通,會大大降低溝通嘅功效。

2. 身體語言

相信呢個世界冇乜人嘅興趣係見工,所以面試會緊張都係人之常情。每人緊張嘅表現都唔同,好似呀花咁就會講嘢突然講快咗,亦都有人會將緊張呢兩個字用強烈嘅身體語言表現出嚟。

石仔嘅外形大大隻隻,雖然今日打扮到官仔骨骨嚟見工,但仍然畀人「好打得」嘅感覺。入到房同佢傾計嘅時候,雖然講嘢都算有文有路,但就不停見到佢兩隻手周圍郁嚟郁去。隻手一時攪下頭髮,一時又攪下個鼻,一時又攪下條頸,有時又兩隻手喺咁捽。雖然把口講到好多嘢,但身體卻很誠實,石仔嘅身體語言話緊畀人知佢其實好緊張,表現一啲都唔淡定。

3. 電話放喺邊?

去見工熄咗手機鈴聲是常識吧。今時今日,大部人去見工都好醒,識得將手機轉去飛行模式。但有啲人唔知係習慣定係唔覺意,鍾意將部手機擺喺枱面上面,菁姐姐就係其中一位。菁姐姐已經有好多年工作經驗,做到中級管理層,唔知係咪因爲佢日理萬機,習慣將手機放喺枱面,呢日嚟到見工一樣都咁做。雖然佢個電話全程都係反轉,不過每隔幾分鐘就會震兩下,其實真係好騷擾。

4. 身上嘅氣味

氣味係好容易忽略嘅細節,因為我地好多時都習慣咗自己嘅氣味,未必知道人地聞到乜嘢氣味。好多女士每日都會噴少少香水,但有啲女士就習慣噴濃烈香水,呢種味道唔係個個都頂得順,尤其是見工就更加要留意一下。另外,有啲吸煙人士鍾意喺見工前食支煙減壓,但入到狹窄嘅面試房間,同面試官近距離接觸,嗰種氣味唔係食粒香口膠就可以遮蔽。夏天就更加要小心,香港天氣炎熱又潮濕,跑一陣追下車,汗味濃郁就好老尷。

Source from: HR小薯蓉, cpjobs

https://www.cpjobs.com/hk/article/%E9%9D%A2%E8%A9%A6%E5%8F%AF%E8%83%BD%E5%BF%BD%E7%95%A5%E7%9A%84%E7%B4%B0%E7%AF%80